ភ្នំពេញ៖ រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានលើកឡើងថា លោកបណ្ឌិត ហ៊ុន ម៉ាណែត ពិតជាស័ក្តិសមបំផុតចំពោះការទទួលបានគោរមងារកិត្តិយសពិសេសដ៏ឧត្តុងឧត្តមពីព្រះមហាក្សត្រ ដោយសារគុណបំណាច់ស្នាដៃរបស់លោកចំពោះជាតិ សាសនា និងព្រះមហាក្សត្រ។

នាយករដ្ឋមន្ត្រី ហ៊ុន ម៉ាណែត ត្រូវបានព្រះមហាក្សត្រសព្វព្រះរាជហឫទ័យផ្តល់គោរមងារកិត្តិយសពិសេសនៃរាជបណ្ឌិត្យសភាកម្ពុជាជា «កិត្តិទេសាភិបាលបណ្ឌិត» នាថ្ងៃទី០៨ ខែសីហានេះ។

ក្នុងលិខិតអបអរសាទរចុះថ្ងៃទី៨ ខែសីហា ឆ្នាំ២០២៣នេះ លោក ឯម ច័ន្ទមករា បានចូលរួមអបអរសាទរជូនចំពោះនាយករដ្ឋមន្ត្រីថ្មីកម្ពុជាដែលទទួលបានគោរមងារកិត្តិយសនេះ និងបានលើកឡើងថា៖ «ឯកឧត្តមកិត្តិទេសាភិបាលបណ្ឌិត» មានគុណបំណាច់ដ៏ថ្លៃថ្លានិងស្នាដៃត្រចេះត្រចង់ក្នុងនាមជាយុវជនជំនាន់ថ្មី និងជាឥស្សរជនដឹកនាំដ៏ឆ្នើមរបស់ព្រះរាជាណាចក្រកម្ពុជា ដែលពោពេញទៅដោយសកម្មភាពជាគម្រូជាក់ស្ដែងជាច្រើនឆ្នាំមកហើយទៅលើវិស័យសំខាន់ៗ ដើម្បីបុព្វហេតុ ជាតិ សាសនា និងព្រះមហាក្សត្រ។

តាមគម្រោងលោក ហ៊ុន ម៉ាណែត នឹងក្លាយជានាយករដ្ឋមន្ត្រីផ្លូវការនៅល្ងាចថ្ងៃទី២២ ខែសីហា ឆ្នាំ២០២៣ ហើយនៅថ្ងៃនោះសម្តេចតេជោក៏នឹងលាលែងពីតំណែងនាយរកដ្ឋមន្ត្រីកម្ពុជាក្នុងរយៈពេល ៣៨ឆ្នាំ៕